Gruveblues på Sjøholt

Eg og arbeidskamerat Ingunn

Blues i ei gruve langt oppe i fjellsida på Sjøholt - kven kan motstå ein sånn opplevelse?
Ørskog har sin årlege bluesfestival, og hadde kick-off i gruvene på Lied. Her er nokre gamle malmgruver, nokre går innover og ein går rett ned. Litt sikring, masse vedkapping - og vips kan ein invitere til konsert i fjellet.

Last Train Home Bluesband

Turen opp er bratt og når det i tillegg hadde regna litt - var det ganske sleipt også. Heldigvis hadde dei lagt ut tau ein kunne halde seg i.

Omlag 4 - 500 hadde samla seg, og fekk ein flott konsert med Last Train Home Bluesband. Bra musikk, bra selskap, tøft opplegg!

Etter to  timar med blues og litt om historia til malamgruvene, var dei fleste nøgde,  kalde, og pjaska seg nedatt. Som prikken over ien kom det litt snøv/sludd på tur nedatt. Rett så uforgløymeleg :-)

Varden x 2

Emma og eg mot Varden

Donald Duck? Neida - Emma og Ruth på truger

To søndagar - to turar på Varden.
20. mai var veret godt, så Emma og eg pakka trugene med Varden i sikte. Det var no bart opp til Nakkjen, og derifrå tok vi på trugene. Mykje fliring og gøy :-) Vi trengte ikkje trugene så veldig langt, for vi fylde ryggen opp  mot toppen,  og der var det ikkje snøv. Litt meir øverst, men det gjekk greitt. Kassa på Varden hadde forsvunne i løpet av vinterern, og frøken Dagmar er hovudmistenkt. Dermed låg det an til ein oppfølgingstur "Ruth on a mission". Flott på toppen som alltid, store skavlar ved varden så her måtte ein vakte sine skritt og ikkje gå forlangt utpå.

Flotte varden på Varden med ny turkasse!

Neste søndag som var pinsedag, vart mor og far med, denne gongen med splonka ny turkasse og bok i sekken. Klart at ein fjelltopp med respekt for seg sjølv må ha ei kasse! Også denne søndagen var veret flott, ganske varmt oppover lia, og i tillegg veg ei slik kasse eindel - så det vart litt svetting. Det meste av snøv var vekk, så turen ovai Nakkjen gjekk lett. Bles litt også på toppen.
Vi demonterte litt varde, og fekk på plass kassa. Litt streng rundt, så sitt den blegg fast - no kan Dagmarar og andre damer med skumle hensikter berre kome!

Jaa - ny tursesong!

Endeleg byrjar snøven å trekke seg godt opp i høgfjellet, og vi kan ta føtene fatt. Rett nok har mister snøv kasta eit par snøfall over oss, men ikkje nok til at vi held oss heime.

På brua overelva - snart oppe.

Mebusætra

Første oppovertrakket skjedde søndag 15. april. Målet var Mebusætra attmed mor og far. Det var fint opp til brua, men derifrå måtte vi vaspe oss gjennom snøven. Vi flaut litt på skara, for så å trakke gjennom til langt over kneet. Vi kom oss opp, og var godt nøgde.

Søndagen etter, den 22. april, måtte vi prøve oss på Nakkjen; Emma, mor og eg. Eg var så lur(?) at eg drassa med meg mine nyinnkjøpte(og dyre) truger. Kjøpt etter å ha gått amokk på netthandelen, greidde ikkje å slutte å by. Trugene vart mine for 352 NOK. Menn akk - så kom porto oppå det, og totalprisen vart nærare 600 kr. Tok å sjekka prisen i etterkant, og ein kan få liknande truger til 399,- kr. Ikkje mitt beste varp asso...

Dei to utan truger.

På truger!

Råsa var fin og snølaus opp til over Tåja.  Der tok eg på meg trugene. Har aldri prøvd truger før, men må seie at det var ein morosam opplevelse. Flira godt der eg trakka som Donald Duck oppover. Bratt var det også. Trugene kom til sin rett når det vart litt flatare terreng. Kjekkt med truger! Emma og Hallbjørg måtte vaspe i snøen. Eg var først opp :-)

Vi kom oss opp alle tre!

Flott regnboge over Ålesund.

På toppen av Sukkertoppen

Tredje turen kom eit par veker etterpå, etter at Emma var godt og vel konfirmert. Onsdag 9. mai var vi på Sukkertoppen attmed Stordal Turlag. 9 stk var med på oppstart-turen, derav 5 frå familien Vinje/Græsmo. Emma, mor, far, onkel Finn og eg. Vi møtte ei regnbyge på veg mot toppen, men ellers var det eit flott ver. Sol og greier. Såg langt utover og innover - Godøya, Vigra, Brandal, Lauparen og andre flotte innafjords-fjell. Litt dis var det, men vi var vel nøgde med utsikta frå "by-toppen". Glatt og sleipt var det, mykje gjørme i råsa - det hadde nok regna meir uttafor enn heime. 

Snø mot Mosætra.

Eg hadde no att ei av dei tre "standard- sætrene" i Stordal - Mosætra. Det er ein veldig fin tur, ikkje så bratt som dei to andre, og med betre utsikt. Sidan mor og far hadde lurt seg avgarde på Nakkjen ein dag eg låg og var pjusk, nøyta eg med laurdags ettermiddag den 12. mai. Veret denne dagen var ustablit, men i tre-fire tida stakk sola fram, og eg fann fram Devold-ull og fjellsko. Brukte tre kvarter opp, og måtte skunde meg siste biten, sidan eg høyrde nokon kom attai meg i råsa. Fekk skrive meg inn i boka, og fått att pusten, og der kom Anita og Vigdis. Hyggeleg selskap på veg nedatt.

Kløvstien med Turlaget 24. august

Oppover går det.

Dette var ein tur eg tenkte var litt lite spennande å gå, men der tok eg grundig feil. Det var ein heftig og flott tur.

Vi gjekk frå nederst i Trollstigen, der er ei bru der det flatar ut. Litt skog i byrjinga, og så startar stigninga. Kløvstien var rusta opp for nokre år sidan, og dei har laga til kjetting å halde seg i på dei mest utsatte partia. Korleis dei før i tida greidde å få kveg og hestar ned her, er eit komplett mysterium. Det måtte no ha gått nokre krøtter-liv på desse sleipe bratte svaberga.

Kløvstien

Så ser vi Stigefossbrua over oss, og vi kjem inn på vegen. Vi fyl den oppover eit stykke før kløvstien tek av igjen. Det er godt merka. Herifrå vert det lettare. Medan ein enno nyt å gå, er ein brått oppe. Vi brukte 1 time og eitt kvarter.   Kjempetur – anbefalast.

Fokhaugtind 20. august

Johan, Emma og Hallbjørg med Fokhaugtind i bakgrunnen.

Det var helg, laurdagsveret var stålande og det kribla i kroppen etter å gå ut. I fjor var Emma med på Dyrdalstind, og eg lovd ho at vi i år skal gå på Fokhaugtind, nabotoppen på Langsætrane. Så i dag passa det perfekt. Mor og far vart også med. Ikkje verst å få med foreldra sine når dei er i siste halvdel av 60-åra!

Fokhaugtind er på 1241 moh og er ein av toppane som omkransar Langsætrane.  Vi gjekk innover mot Dyrdalen, og ettekvart skråa vi oppover(skråa og skråa – vi gjekk vel mest rett opp…). Det er inga rås til toppen. Vi gjekk gjennom bregneskog, og det var ikkje lett å fote seg. Dermed rulla eg(i oppoverbakke). Ute av bregneskogen kom ura. Litt vegetasjon innimellom, men etterkvart vert landskapet temmeleg goldt. Fokhaugtind består av mykje laus ur, så ein må passe sine steg.

Oppover berst det. Vi får no utsikt til Storevatnet og Kamben. Ei lita grå rype spring mellom steinane og freistar å gøyme seg. 

Opp gjennom ura

Opp her skal vi - Emma leder an.

Klyvjing på Fokhaugtind.

Litt utfordringar må ein ha, så tett under toppen klartar vi opp ein skrent. Går bra, det! Som vanleg får ungdommen rakett i rævva når vi er nesten oppe, og skal vere først på toppen. Og det vert ho :-). Endeleg oppe på Fokhaugtind 1241 moh! Hærleg! Det er forunderleg flatt og grøderikt på toppen. Fint å sette seg i lyngen/mosen og ete nista si og skue utover. Vi ser smale Dyrdalen, dei to vatna i Storådalen, Langsætrane og  Overøye med alpintraseen – lovely!

Emma er først på toppen!

Posering framfor Varden.

Flott utsikt mot Stolen og Rolvsbotnskorkja.

Full avslapping for han far.

Vi unner oss ein lang god pause på toppen. Men klokka går, og vi må tilslutt tenke på nedturen. Ura består av ganske store steinar, så heile kroppen må takast i bruk på nedturen.  Vi hoppar, aker oss, bøyer oss, klivrar. Noko ein forresten kjende att i heile kroppen dagen etter, ikkje slike bevegelsar ein normalt brukar på ein fottur, nei.

Emma akar seg ned ura frå Fokhaugtind.

Vi kjem oss nedom det verste av ur, og bestemmer oss for å ta ei litt anna rute, utpå ein rygg for å sjå på ei flott utsikt.
- Går det an å gå ned her då? Det vart visst ganske bratt, ja. Vi aka oss på rompa nedover ei mosekledd kløft, men det gjekk bra! Vel nede i bregneskogen er det pappa sin tur å rulle. Sakte kontrollert overtipping. Nummeret før han havna i ein liten bekk. Vi flirar godt. Vi kjem inn i krattskogen og brasar gjennom fjellbjørk eit stykke, før vi finn råsa frå Dyrdalen. Den er sleip etter alt regnet som har vore, så brått sklir eg og deiser i bakken. Vi flirar :-)

 

Vi brukte fire timar opp, og 6,5 timer totalt. Super tur, flott utsikt og bra trening til heile kroppen.

Tur med Stordal Turlag

Stordal Turlag på Ljøbrekka

To turar forrige veke, først Ljøbrekka På Hellesylt, og seinare storturen Holmen - Tua - Fjelladalen - Stavseng.

Pust i bakken

Ljøbrekka går frå Herdalen i Stranda til Ljøen på Hellesylt. Flott tur, litt skodde i starten, men vi fekk utsynet over Geiranger- og Synnylvsfjorden på tur ned.

På Tua med utsikt mot Stordalen

Søndag gjekk vi frå Stordalsholmen over Tua til Stavseng. Kjempetur i kjempever!
Begge turane vert lagt ut på heimesida til turlaget: www.stordalsportalen.no/stordalturlag.

Jan og eg har akkurat gått ein snøbretunell.

Foto: Alexander Oudjik

Besseggen 4. august

"Har du gått Besseggen?"

Ein tur ein kvar ihuga fjellvandrar burde ha prøvd. Vi også. Dermed pakka dotter Emma, mor, far og meg sjølv sekken, og satte kursen ned i dalom. Kjekt å ha foreldre med campingvogn, og etter ei heller låk natt på harde campingvognsenger, vakna vi til flott ver og ein forlokkande Bessegg.

Vi tok båten "Gjende" inn til Memurubu, saman med 100 andre. Mykje danskar, "Besseggen Travel" må ha brukt mange markedsføringskroner hos grannelandet. Vel  i land var det null problem å finne vegen, det var berre å følge straumen. Vi var nok ikkje dei einaste, nei...Frå Memurubu er det stigning, men der det flatar ut, var det heilt greitt å gå. Litt meir opp, forbi eit lite vatn litt meir bortover og vi kom omsider til bandet.

Hit skal vi!

Huff -korleis skal detta gå?

Ho mor med høgdeskrekk såg no med grøss og gru opp på den smale Besseggen. Kor skal detta gå?  Etter litt inntak av næring, klatra vi avgarde. Litt klyvjing er det, men ikkje avskrekkande. Emma for som ein rakett oppover, og vi såg ho ikkje att før på toppen.

Det ein no trur, er at det verste er gjort. Til info: slik er det ikkje. Etter Besseggen er det eit fjell som skal forserast; Veslfjellet på 1743 moh. Dette er eit slikt fjell, der ein trur ein ser toppen, men so er det ein ny topp framom. Slik gjekk det i det uendelege. Men omsider kom vi til toppen med den største varden, og Emma og eg kasta stein på varde. Jippi!

Klatring på eggen

Mor og far med Gjende og Bessvatnet i bakgrunnen

Resten av turen var lang. Ein skal mykje lenger tilbake enn ein skulle tru, før det endeleg går nedoverbakke. Ein ser parkeringsplassen ved enden av Gjende og campingplassen langt der nede.

Steinkasting på stor varde på Veslfjellet

Med alle våre pauser og fotoshoot, brukte vi godt  timar på turen. Vi var slitne, og det gjorde godt å kome "heimatt" i campingvogna. Det var ein fornøyelse å betale 30 kroner for å få dusje i åtte minutt(yeah-right).

Ruth på tur!

Folk ein legg merke til
På turen ser ein ymse skalg folk som ein bit seg merke i.
Vi har for eksempel det engelske ekteparet. Ho gjekk foran mesteparten av turen, og han kom bak med små skritt. Dei var nok rundt 80 eller so.Vi held fylje nesten heile vegen, for engelskmann-paret gjekk jamt og trutt, medan vi skulle ta så mykje bilde og sjå hit og dit. Men tur du ikkje at dei gjekk frå oss etter siste toppen! Fortærande!
Dei andre vi beit oss merke i var den danske familien i dongribukser. Dei hadde ikkje så mykje profft turutstyr, kan ein seie, dongri, lette jakker og joggesko. Når vi nådde dei att oppi, og det var ganske tidleg på turen, halta den eine sonen. Han var kanskje tidleg i tenåra. Broren støtta han av og til, men mest halta han avgarde sjølv.
Likeins som med engelskmann-paret, nådde vi dei att, dei passerte oss, osv. Stakkars guten som halta seg over Besseggen, det såg skikkeleg låkt ut på slutten. Då støtta faren han, medan vi ikkje kunne sjå mora(kanskje gått i forvegen?) Håper dei kom seg nedatt og fekk orden på foten.

Long way home...

Og Besseggen - kva synest vi? Eg kunne ikkje hjelpe for at eg gjekk å tenkte på for ei perle det kunne ha vore utan alle turistane. For det var ein kjempeflott tur, men samtidig prega av slitasje etter at 30 - 40 000 går der kvart år. Eg har gått Beseggen - ja - men det vert nok med denne eine gongen. Trur eg skal finne meg nokre litt meir uberørte fjell - det har Norge nok av :-)